وجع
طابق عصدرك ... هالوجع
محتار ... شو تعمل معو
بحدود عينيك انطبع ...
كِبر الدني ... ما بيوسعو
بحّيت صوتك بالنِدا ...
ضاع الحكي ... و ملّ الصدى
ما ضل حدا ... ينجد حدا
و الحق مين بيسمعو ...
مقهور ... شو صعب القهر
و الناس ... بتقلّك صبر
و النار عم تحرق صدر ...
فوق الوجع ... المقطّعو
ما عاد يقدر هالحكي ...
يشفي غليلك ... و البكي
معقول ما فيك تشتكي ...
كاس المرار ... الجارعو
مجروح ... حاسس بالرفض
و لسّه بصدرك هالنبض ...
نور السما ... و نور الأرض
ربّك ... بقلبك زارعو
و لك قوم ... لسّاتك صخر
جوّاك ... ينبوع العمر
مكتوب ... يتفجّر نصر
ربّك لأرضك وادعو ...
ليست هناك تعليقات:
إرسال تعليق