كان يجمعنا بيت واحد ، و بنفس الغرفه كنا نمضي السهرة ، و على نفس التلفزيون - ولازم الكل يتواجد بمسلسل السهرة ... بتذكر كان اسمه " احلام كبيرة ، إخوة التراب .. و المحكوم أو خلف الجدران " ...
نفس الضحكة كانت عند الكل .. و نفس الدمعه " العيلة كلها تبكي ع ممثل مات او ضاع او ..... "
و اكبر كذبة إنو كل واحد فينا يعمل حالو نايم مشان يحملوه الباقيين عالسرير ...
دعوات أمي هي الشي الثابت و الروتيني بأيامنا .. حلمها انو نكبر و نتخرج و تفرح فينا ..
كنا صغار وما كنا نعرف انو الزمن مخبيلنا ورا حيطان هالايام واحد " ابن حرام " - الحقد عامي قلبو ، رح يدمر أحلامنا و آمالنا ، و حتى ذكرياتنا رح يسجنها ....
اليوم بين بلاد و بلاد اتوزعت هالعيلة .. و صار كل مين لحالو ، و حلم انو يسمعو صوت اللي بسوريا .. و منية من الله يرجعو يلتموا سهرة وحدة ; و صار للام حلم واحد إنها تشوف كل اولادها سوا وهنن بخير لمرة وحدة ...
وبيقولوا ليش بعيونك في نظرة قهر .. !!؟؟...